Xosé Ratzinger, o ano que ven, de tazas pola rúa do Franco

Decátome hoxe que o ministro de Asuntos Exteriores, Miguel Anxo Moratinos, invitou o papa a coñecer Santiago co motivo do Ano Xacobeo, que pola necesidade de encher os petos do Vaticano non pode rexeitar. O gremio da hostelería, cabilando no negocio, xa está a propoñer ao Concello que o faga gran comendador da Orde do Sagrado Fígado sen Mancha e cabaleiro da Vieira valeira. Como non é tolo de todo aproveitará a viaxe de volta, xa que toda a visita é de balde e a papo cheo, para levar os cántaros de viño, que necesita para oficiar, e que recolle dos bacelos que ten a medias con Paco Vázquez na Ribeira Sacra. O envexoso e gurteliano Feijoo anda a mercar as viñas extremeiras para levantar unha capela a san godello e santa mencía. Se non o credes, válgame deus, aí vai unha imaxe de Ratzinger traballando de incógnito e con ledicia na colleita da súa derradeira vendima.